Karnataka-in sorkar laipui hnenah Rs vbch 100 dil

Karnataka sorkar chuan an state-in tuilian an tawrh mekah chhawmdawlna, cheng vaibelchhe 100 pe turin sorkar laipui a ngen.

Chief Minister HD Kumaraswamy chuan ruahsur nasa avanga Kodagu district-in tuilian an tawrh mek chungchang sawiiin, "Prime Minister chuan Kerala tuilian tuarte ṭanpuina turin cheng vaibelchhe 500 a pek tur thu a puang tawh a, Kodagu bial tan hian cheng vaibelchhe 100 tal min pek ve kan beisei a ni. Tuilian-in inkalpawhna kawng a tihchhiatte siamṭhat a ngai a ni. Tuilian tuarte ṭanpui tur hian Indian Army leh National Disaster Response Force (NDRF) chuan min pui bawk a ni", a ti.

Karnataka-ah hian tuilian vangin mi 12 in nunna an chan tawh a, mi 6,600 chuang chu relief camp-ah an awm mek bawk.

Andhra Pradesh-a Godavari district-a thingtlang khaw 28 te chuan Godavar leh Krishna lui lian vangin harsatna an tawk mek bawk. State sorkar chuan lui kama chengte chu hmun him lama insawnchhuak turin a hriattir bawk. AP-ah hi chuan tuilian vanga nunna chan an awm lo niin State Disaster Management Authority (SDMA) chuan a tarlang. Mahse East Godavari district-ah mi 2,982 leh West Godavari district-ah mi 6,336 chu relief camp-ah an awm a ni.