Kerala tana ramdang ṭanpuina pek dawng dawn lo

Sorkar laipui chuan tuilian vanga chhiatna nasa tak tawk mek, Kerala state ṭanpuina tura ramdangten thilpek pek an tum chu lawmawm a tih thu a sawi rualin, ramdang aṭangin ṭanpuina sum dawn a tum lo tih a sawi.

Kerala tuilian tuarte ṭanpuina tur hian UAE, Qatar leh Maldive-te chuan ṭanpuina sum pek an tum thu an sawi tawh a ni. Mahse sorkar laipui chuan an inhuamna chu lawmawm hle mah se, tuilianin Kerala-a chhiatna a thlente din thar leh turin India chuan ama sum leh thil neihte a hmang dawn tih a sawi. Mahse hei hian ram pawn lam aṭanga mimala ṭanpuina pe duh te erawh a huam tel lo a ni.

UAE chuan Kerala ṭanpuina atan hian cheng vaibelchhe 700 a pek tur thu a lo sawi tawh a, Qatar-in cheng vaibelchhe 35 leh Maldive-in cheng nuai 35 an tiam bawk. United Nations lam pawhin puih a inhuam thu a sawi a, hei pawh hi sorkar chuan a hnawl dawn nia sawi a ni.

India hian kum 2007 aṭang khan ramchhunga chhiatna thlengah ramdang sorkar leh pawl aṭangin ṭanpuina sum a dawng ngai lo. Uttarakhand leh Kashmir-a tuilian vanga chhiatna nasa tak a thlen ṭum pawh khan ramdang ṭanpuina a la lo a ni.

Kerala sorkar chuan an state chhunga chhiatna nasa tak thleng vang hian sorkar laipuiah ṭanpuina cheng vaibelchhe 2,600 pe turin a dil. Sorkar laipui chuan Kerala puihna tur hian Thawhlehni khan cheng vaibelchhe 600 chu state sorkar hnenah a pechhuak tawh a, state dangte pawhin ṭanpuina sum eng emaw zat an pe tawh bawk.

Sorkar laipui chuan ṭanpuina sum fai bakah, Kerala-a tuilian tuarte tan hian chaw lam chi ton 89, 540 pek a remti bawk. Nitin pulses (dal) ton 80 a thawn lut dawn a ni. Hemi hma hian pulse hi MT 100 a lo pe tawh bawk a ni. CM Pinarayi Vijayan-an Prime Minister Narendra Modi-a hnena lehkha a thawnah, tuilian tuarte tan ei tur, chaw lam chi ton 1.18 pe turin alo ngen tawh a ni.

Public Sector Oil Marketing Company-te chuan Kerala ṭanpuina tur hian Chief Minister's Relief Fund-ah cheng vaibelchhe 25 an pe. Union Home ministry chuan Kerala tan bik hian non-certified vehicle-te pawh LPG cylinder an phurh phalsak a ni tih sawiin, LPG cylinder nuai 3.2 leh regulator nuai 2.2 thawn a ni, a ti.

Railways pawhin tui thianghlim in tur litre nuai 24 leh tui bottle nuai 2.7 a thawn tawh bawk. Health Ministry chuan a hmaa chlorine tablet vaibelchhe khat a thawn bakah, tablet vaibelchhe thum a thawn belh leh. Bleaching powder leh sanitary pad nuai 1.76 thawn a ni bawk a, a dang pawh thawn leh thuai tum a ni. Ministry of Food Processing Industries chuan hmarcha, chi, thingpuife leh coffee te a supply bawk niin state chuan a sawi.