Hri kai thar nuai 2.4 chuang awm

Nilaini khan India ramah Covid-19 hri kai thar nuai 2.47 an awm belh leh a, nikum May thla hnua ni khata hri kai thar an tam ber ṭum a ni. Thawhlehni aiin hri kai thar hi 27% in an tam zawk bawk.

State/UT 28-ah Omicron kai hmuh chhuah an ni tawh a, Nilaini zan thleng khan India ramah Omicron kai hmuh chhuah 5,488 an awm tawh.

Hri kai mek, active case chu maktaduai khat chuang leh tawhin hri kai hmuh tawh aṭanga 3.08% a ni a, hri kai enkawl dam, recovery rate pawh 95.59% ah a tlahniam tawh a ni.

Ni khata hri kai hmuh chhuah, daily positivity rate chu 13.11% niin, weekly positivity rate chu 10.80% a ni bawk.

Maha-ah Covid vangin police 265 thi tawh
India rama Covid-19 hri leng tuar nasa ber, Maharashtra state-ah chuan hripui vang hian police 265 an thi tawh a, hri kai enkawl mek 2,000 chuang an awm bawk.

State police chuan hri vanga police thi zingah Mumbai police an tam ber tih sawiin, Mumbai police 126 in an thihpui tawh a ni.

Maharashtra-ah hian Nilaini khan hri kai thar 46,723 an awm belh leh a, a hma ni aiin hri kai hi 27% in an tam zawk a ni. Hri kai thar zingah hian Omicron variant kai 86 an tel bawk a, an state-ah Omicron kai hi 1,367 an awm tawh.

Kolkata-ah weekly positivity rate 60.29%
West Bengal khawpui, Kolkata-ah hri kai an pung chak hle a, union ministry of health and family welfare (MoHFW) chuan Kolkata-a weekly positivity rate chu 60.29% a tling chho tawh tih Nilaini khan a sawi.

January 11 khan West Bengal-a Howrah district-ah weekly positivity rate hi 50.89% a lo ni tawh bawk.

Nilaini khan Kolkata khawpui chhung bikah hri kai thar 7,060 an awm a, a hma ni aiin hri kai thar hi 495 in an pung a ni.