PM Modi-a'n CM-te meeting neihpui

Prime minister Narendra Modi chuan ram chhunga hri leng dinhmun sawipuiin, nimin tlai dar 4;30 khan video conferenceing kaltlangin chief minister-te meeting a neihpui.

Prime Miniter hian tun ṭum hi hri leng dinhmun sawipuia kumina CM-te meeting a neihpui ṭum khatna a ni a, nikum khan ṭum eng emaw zat meeting hi a lo neihpui tawh a ni.

PM Modi hian kar liam ta khan high-level meeting a lo ko tawh bawk a, ram chhunga hri leng mek dinhmun te, healtcare system lama inbuatsaih dan te, vaccination campaign kalpui mek leh public health dinhmunte an sawiho a ni. He meeting-ah hian health secretary chuan khawvel ram hrang hrangah Covid hri darh chhoh mek dan report kimchang a pe bawk niin PM Office chuan a sawi.

Nimina meeting hi union home minister Amit Shah leh health miniter Mansuk Mandaviya-ten an telpui bawk a ni.

Ram chhunga hri lengin zual lam a pan zel avangin state tam takin hri darh tur venna atan khuahkhirhna dan thar leh khauh zawkte an siam thar leh tawh a, hetihlai hian state panga chuan February-March thla hian assembly inthlan an nei dawn a ni. Inthlan neihna tur state-ah hian hri leng an pung nasat avangin inthlan hun sawn tura phutna pawh a tam hle. Mahse Election Commission chuan inthlan hun hi sawn a tum lo a, campaign leh vote thlak laia hri darh tur laka invenna atan kaihhruaina dante siam a tum zawk.