Covid-19 positivity rate 14.78%-in pung

India ramah nimin khan Covid-19 hripui kai hmuh chhuah thar 2,64,202 an awm leh a, Ningani aiin 6.7%-in hrikai an tam zawk bakah ni khatah positivity rate chu 14.78%-in a pung bawk.

Nimin report-a a lan dan chuan hri kai dama puan mi 1,09,345 an awm laiin hri kai mek chu 12,72,073 lai an awm a, heng zinga 5,753 chu Omicron variant kai an ni. Niminah khan mi 315-in an thihpui leh bawk. India ramah hian hripui kai 3,65,82,129 an awm tawh a, chung zinga 3,48,24,706 chuan dampui leh tawhin 4,85,350 chuan an thihpui thung.

Omicron case bikah hian nimin khan hmuh chhuah thar 620 lai an awm leh a, he variant kai tawh 5,753 zinga 2,162 chu dam leh tawhin niminah ringawt pawh khan 357 chu dama puan an ni.

Maharashtra chu hri kai tamna ber state an la ni zel a, nimin thleng khan 70,81,067 laiin kai tawhin nimina kai thar report-ah pawh 46,406 lai an awm leh a, mi 1,41,737-in an thihpui tawh bawk. Kerela chu hri kai tam pahnihna an ni a, Karnataka chu pathumna an ni ve bawk.

Omicron kai tamna ber pawh Maharashtra bawk hi an ni a, 1,376-in an kai tawh. Rajasthan chuan dawtin case 792 an nei tawh a, Delhi chu pathumna ni thungin case 549 an nei tawh a ni. Nimin report-ah chuan Rajasthan hian Omicron case thar an ngah ber a, 147 lai an nei a, Delhi erawh hi chuan pathum chiah an neih belh thung.

Tunhnaia UN report chuan ram hrang hrangte chu fimkhur tura chahin hripui vanga thi an pun thut theih thu an tarlang tawh a, hemi hnu hian ram hrang hrangin inkhuahkhirhna dan pawh an tikhauh ṭan leh tawh hle.

Madhya Pradesh chuan nimin khan inkhuahkhirhna dan thar tichhuakin tunthla chhung chu zirna in leh hotel khar a nih dawn thu an tarlang a, punkhawmna lian tham siam an khap bawk. Calcutta High Court chuan West Bengal Election Commission chu civil body inthlan an neih hun tur pawh kar li aṭanga kar ruk velah tal sawn hla leh tura hriattirin, EC chu darkar 48 chhunga an dinhmun tinghet turin an ti a ni.

Ningani khan prime minister Narendra Modi chuan state hrang hrang chief minister-te chu video conferencing kaltlangin meeting a neihpui a, chu chu hri leng thawh thumna thlen hnua state hrang hrang CM meeting a neihpui vawi khatna niin union home minister Amit Shah leh health minister Mansuk Mandaviya-te'n an telpui.