Bengal-a rel chesualah mi pakua an thi

Bikaner-Guwahati Express rel chu Ningani khan West Bengal Jalpaiguri district-a Maynaguri khaw bulah a chesual a, mi pakua an thih bakah 37 an hliam.

Nimin chawhma lamah khan official-te chuan hliam 37 hi damdawi-inah dah an ni tawh tih sawiin, coach ṭhenkhatah passenger tang, la lakchhuah loh an awm tih an sawi bawk. Hliam zinga paruk chu an dinhmun a ṭha lo hle a, North Bengal Medical College and Hospital, Siliguri-ah dah niin hliam dang erawh Jalpaiguri leh Maynaguri-ahte an enkawl zui thung.

Railway Minister Ashwini Vaishnaw chuan nimin zingah khan rel chetsualna hmun hi tlawhin,"Rel kawng uluk takin kan endik tawh a, a landanah chuan equipment fel lo a awm vanga chhiatna thleng a nih hmel. A chhan tak chhui chiang turin thupek kan tichhuak tawh." tiin thuthar thehdarhtute a hrilh a, chhiat tawk chhungte chu zángnadawmna an pe nghal dawn tih a sawi bawk.

Rel chesual hi Bikaner aṭanga Guwahati pana kal a ni a, Ningani tlai dar 5 velah khan a chesual. Railway minister chuan passenger nunna chan ta chhungte hnenah chuan Rs nuai nga pek an nih dawn bakah hliam tuarte pawh an hliam nat dan azirin Rs nuai khat leh Rs 25,000-te an pe dawn tih a sawi a ni.