Kerala-ah bawlhhlawh thenfai hna thawk ṭan

Kerala state-a tuilian chuan ziaawm lam a pan tawh a, tuilianin bawlhhlawh a hnawl khawmte thenfai hna thawh ṭan a ni. Tuilian vanga relief camp-a awm mi tam tak pawh an in lamah an kir leh tawh bawk.

Bawlhhlawh thenfai hna thawk tura inpem, electrician, plumber leh volunteer sang tel chua nimin aṭang khan tuilianin in a chim leh vantlang hmun pawimawhte thenfai hna an thawk ṭan. State sorkar chuan Thiruvananthapuram-ah khawpui hrang hrang thenfai hna thawhna kawnga pui turin control room a din bawk.

Waste and water resources management leh organic farming buaipuitu, Haritha Kerala Mission chuan thenfai hna thawhna kawngah hian a pui dawn bawk a, hmun hrang hrangah high-power set 50 a dah dawn a ni.

Tuilian hian kam lam pan tawh mah se, mi nuai 13.43 vel chu state chhunga relief camp 3,520-ah an la khawsa mek. Nimin khan Chief Minister Pinarayi Vijayan chuan Alappuzha leh Pathanamthitta-a camp ṭhenkhat a tlawh a, camp-a chengte hian an harsatna neihte an lo hrilh.

Kerala Water Authority chuan tuilenna biala tui thianghlim in tur supply hna a thawk mek tih state water resources minister Matthew T Thomas chuan a sawi. Thomas chuan tuilianin a tihbuai water supply scheme 1,089 zingah 800 chuang chuan hna an thawh leh thei tawh a, a dangte pawh siamṭhat thuai tum an ni, a ti.

Zirchiangtute chuan tuilian vanga Kerala state-in chhiatna hrang hrang a tawh aṭanga indinthar leh tur hian kum 10 tal a ngai dawn niin an sawi.

State sorkar chuan tuilianin an state-a thil a tihchhiat hlut zawng hi cheng vaibelchhe 20,000 vel niin a chhtu a, sorkar laipuiah ṭanpuina cheng vaibelchhe 2,600 pe turin a ngen a, hei bakah hian Mahatma Gandhi Rural Employment Guarantee Scheme (MGNREGA) hnuaiah hetiang zat hi pe turin a ngen bawk. Hetihlai hian sorkar laipuiin ṭanpuina a pek hi cheng vaibelchhe 700 a ni.

Ram dangten Kerala ṭanpuina tur sum an pekte chu sorkar laipui chuan a dawng dawn lo tih a sawi. Ramdangten puih an inhuamna chu lawmawm hle mah se, ramchhung sum leh thilneih hmangin chhiatna tuartute ṭanpui leh chhawmdawl hna hi thawh tum a ni, a ti. Hemi chungchangah hian inhnialna pawh a tam phah hle. Kerala finance minister TM Thomas Isaac chaun sorkar laipui chu a ni lo zawnga thil thlirah a puh a, UAE sorkarin Rs vbch 700 pek a tum chungchang pawh sawichhuakin, ramdang sorkar hnenah a hrana ṭanpuina an dil loh thu a sawi. Communist Party of India (Marxist) kaihhruai Left Democratic Front sorkar pawhin ramdangte ṭanpuina pek chu dawn ṭha an tih thu a sawi.