Mipa ten hmeichhia an en dan an thlak a ngai: Rahul Gandhi

Congress party president Rahul Gandhi chuan India mipa te chuan hmeichhia te chu an enhniam tih sawiin, hmeichhia an en dan chu an thlak a ngai tih a sawi.

Hetihlai hian Rahul Gandhi chuan India chu hmeichhia te tana hmun him lo ber nia puan chu a pawm loh thu a sawi thung.

Nilaini-a Hamburg-a Bucerius Summer School-a thu a sawinaah Rahul chuan India chu khawvela hmeichhia te tana hmun ralmunag lo ber tia sawi a awm chu a pawm lo tih a sawi a, mahse India ramah hmeichhiate laka tharum thawhna erawh a hluar hle tih a sawi. Hmeichhe laka pawikhawihna tam tak chu hmuh theih a ni a, kawngdungah te pawh hmuh theiha a awm laiin tam tak erawh chu hmuh theih si loa thleng a nih thu a sawi a ni.

Hmeichhe laka hleihlenna thlenna tam tak chu inchhungah a nih thu sawiin, ngai an lo neih tawh vang te pawh a ni maithei, hmeichhia te chuan an sawichhuak ngai lo a ni, a ti. Hemi anih avang hian mipa te chuan hmeichhia kan en dan chu nasa taka kan thlak a ngai a ni, a ti bawk a, buaina tam tak pumpelhna a nih dawn thu a sawi bawk.

India ramah tharum thawhna in zual lam a pan thu te, dinhmun hniam zawka ding te chu a tuar nasa ber tu an nih thue sawiin, tharum thawhna a nasat poh leh hmeichhia te tawrhna pawh a zual a ni, tiin Congress hotu chuan a sawi.

Hmeichhe aiawh legislature neih chungchang sawiin Rahul chuan political party leh Parliament-ah pawh hmeichhe aiawh an tam tawk lo a, hetiang a nih chuan hmeichhia te chuan an aw an chhuah thei dawn lo tih a sawi. Hmeichhia an tel loh chuan ram hlawhtling tak a din theih loh a ni, a ti bawk.