Kerala-a tuilen chhanah Mullaperiyar Dam tui paihchhuah puh

Kerala sorkar chuan an state-in tuilian nasa tak a tawrhna chhan pakhat chu Tamil Nadu sorkarin Mullaperiyar Dam aṭang tui a paihchhuah thut vang niin Supreme Court a hrilh.

Supreme Court chuan Kerala sorkar thu thlen vang hian Tamil Nadu sorkar hneah Mullaperiyar Dam-a tui chu August 31 thleng feet 139.99 chin tal dah turn a ti. Tamil Nadu sorkar chuan Kerala puhna hi a pha thung a, Mullaperiyar Dam tui inchuh chungchanga thubuai an neih mekah an state dinhmun tihchhiat tuma ruahmana nia a lan thu a sawi. Tamil Nadu Chief Minister Edappadi Palainasamy chuan, dam pakhat aṭanga tui paihchhuahin Kerala state hrang hrangah tuilian a thlen theih thu a awm lo tih sawiin, tuilenna chhan chu dam 80 chuang

aṭanga tui paihchhuah vang a ni, a ti.

Court chuan hemi chungchang hi September 6-ah ngaihtuah turina dah a, he thil hi state pahnih inkar buaina anga ngaihtuah a ni dawn lo tih sawiin, chhiatna thleng leh mihring nunnain a tawrh chungchang chauh chu a ngaihtuah tih a sawi.

Ningani-a Supreme Court-a affidavit a thehluhah, Kerala sorkar chuan an state-a tuilian chuan state mipui vaibelchhe 3.48 zingah hmun ruka ṭhena hmun khat, nuai 54 chuang a nghawng thu a tarlang. Tamil Nadu sorkar hnenah hian Mullaperiyar Dam tui chu zawi muanga paihchhuak turin vawi eng emaw zat an ngen a, mahse an ngenna hian ngaihsak a hlawh lo niin a tarlang. Ṭum khatah he dam aṭanga tui tam tak paihchhuah chuan reservoir dangte chu tui paih chhuak lo thei loin a siam a, hei hian chhiatna a thlen phah niin a tarlang a ni.

Tuilian hian thingtlang khaw 774 a chim nia tarlan a ni a, hemi rual hian tuilian tuarte ṭanpui leh chhawmdawlna kawnga mi hrang hrang inpekna chu lawmawm an tih thu sawiin, Kerala-a sangha mantute leh Odisha Fire Service chungah an lawm hle tih an sawilang bawk.