Jharkhand-in Lalu Prasad bail dilna hnawl

Jharkhand High Court chuan ranchaw man tihchingpen thubuai pali-a thiam loh chantir, Rashtriya Janata Dal (RJD) hotu Lalu Prasad Yadav-an a bail pawhsei a dilna chu hnawlin, August 30 hmaa court-a inpe turin a ti.

Lalu-a ukil, senior lawyer Abhishek Manu Singhvi chuan nimin khan Lalu-a bail hi thla thum pawhsei sak turin a dil a, mahse court chuan ni thum chauh pawhsei phalsakin, August 30-ah RJD hotu hi inpe turin a ti a ni.

Lalu-a ukil dang, Prabhat Kumar chuan Lalu hi Ranchi-a Rajendra Institute of Medical Sciences (RIMS)-ah enkawl leh a ngai dawn niin a sawi. Tuna an enkawl mekna, Mumbai-a Asian Heart Institute aṭangin Ranchi-ah hian hruai a ni dawn a ni, a ti. Lalu-a fapa, Tejashwi Yadav pawhin a pa hi natna hrang hrang vanga damdawi-inah hian dahluh a nih thu a sawi bawk.

Kum 2017, December thla khan Bihar chief minister hlui, Lalu Prasad Yadav hi a CM laia sorkar laipui aṭanga ran chaw man sum tam tham tak an dawn tihchingpen thubuaiah thiam loh chantir a ni. Kumin January leh March thla khan thubuai dang pahnihah thiam loh chantir a ni leh bawk a, kum 14 tang tura hrem a ni. Kum 2013 khan ranchaw man tihchingpen thubuaiah hian thiam loh chantir a lo ni tawh bawk a, kum nga jail tang turin an lo hrem tawh a ni.

Enforcement Directorate (ED) chuan nimin khan Lalu Prasad-a nupui Rabri Devi leh a chhungte dang lakah Indian Railway Catering and Tourism Corporation (IRCTC) hotel sakna tur contract private firm hnena pek a nih chungchangah chargesheet a thehlut bawk.