R-Day lawmnaah mi 24,000 chin kal phal dawn

Kumin January 26-a Republic Day lawmna pui ber, Delhi-a neih turah hri leng vangin mi 24,000 chin chauh kal phal a ni dawn.

Nikum khan Covid-19 hri leng avangin Republic Day parade neihnaah mi 25,000 chin kal phal a lo ni tawh a, kumina kal phal zat hi an titlem leh hret a ni.

Kuminah hian nikum ang bawkin Republic Day lawmaah hian ram dang hruaitu khuallian an awm dawn lo niin a lang. Sorkar chuan Central Asia ram panga - Kazakhstan president Kassym-Jomar Tokayev, Uzbekistan president Shavkat Mirziyoyev, Tajikistan president Emomali Rahmon, Turkmenistan president Gurbanguly Berdimuhamedow leh Kyrgyztan president Sadyr Japaror-te chu khuallian atan hian sawm mah se, an rawn tel dawn em tihchian a la ni lo.

Britain prime minister Boris Johnson chu nikum khan R-Day lawmnaa khuallian tur hian sawm niin, mahse an rama hri kai nasa taka an pun chhoh avangin a rawn zin tum hi a ṭhulh leh ta a ni.

Hri len hmain Republic Day parade neihnaah hian mi nuai 1.25 velte an tel ṭhin a, mahse ram chhunga hri a len avangin nikum leh kuminah tel thei zat hi nasa taka tihtlem a ni. Kumina mi 24,000 chin telna turah hian seat 5,200 chu general audience tan dah niin, a bak chu mi sawm bikte tan dah a ni ang.

Parade neihna hmunah hian mipuite chu feet ruk danah ṭhut tir vek an ni dawn a, face mask hman vek tur a ni bawk. An ṭhutna hmun hi damdawi hmanga kah thianghlim vek niin, parade-naa tel cultural participant leh armed forces mi leh sate chu vaccine dose kima la vek an ni tur a ni bawk. Parade neih hmain Covid-19 an kai leh kai loh test vek an ni ang.

Podium-ah VVIP tan chauh seat siam a ni dawn a, president Ram Nath Kovind, vice president M Venkaiah Naidu, prime minister Narendra Modi, defence minister Rajnath Singh leh minister of state for defence Ajay Bhatt-te an ṭhu ang. Defence ministry chuan vawiin hian marching contingent leh tableaux tel tur kimchang a tichhuak dawn a ni.

Kumin aṭangin Republic Day lawmna hi Subhas Chandra Bose piancham, January 23 aṭangin neih ṭan a ni ṭhin tawh dawn tih sorkar chuan a sawi.