EC-in mipui punkhawm huaihawt khapna Jan 22 thleng pawtsei

Election Commission of India (ECI) chuan kar liamta Inrinni khan assembly inthlan neihna tur state pangaah public rally leh roadshow huaihawt khapna chu January 22 thleng atan a pawtsei.

Poll panel hian February 10 - March 7 inkara phase sariha inthlanna neihna tur Goa, Manipur, Punjab, Uttar Pradesh leh Uttarakhand-a political party-te chu ngaihhnathiamna ṭhenkhat a pe thung a ni.

"ECI chuan January 22, 2022 thleng rally leh roadshow neih khapna a pawtsei a, mi 300 aia tam lo emaw hall chhunga leng zat aṭanga 50% emaw SDMA (State Disaster Management Authority)-in seat limit a siam chin chauh punkhawm phal a ni," tiin Election Commission chuan twitter kaltlangin an puang.

"MCC(Model Code of Conduct) leh Covid inkaihhruaina dan zawm turin ECI chuan political party-te a ngen a ni. State/District-a thuneitute chuan MCC leh Covid kaihhnawiha inkaihhruaina an siamte an kengkawh ngei tur a ni" a ti. State pangaa assembly poll neih hun tur an puan rual khan ECI hian ramchhunga Covid-19 kai pung chho zel vangin inkaihhruaina dan thar a tichhuak a, dan thar hi state tinah a hranpaa kalpui tura siam danglam tura tih a ni. Dan tharah hian public rally, roadshow, padayatra (foot march) leh kawngzawhte January 15 thleng huaihawt khap a ni.

Sushil Chandra kaihhruai poll body hian party-te chu virtual programme uar zawk turin a ti. Nikum khan ECI chuan Covid-19 hri leng thawh hnihna thlen laia state pali leh Puducherry(UT)-ah inthlan an buatsaih avangin sawiselna an tawk nasa hle a ni.

Constituency 403 awmna Uttar Pradesh-ah inthlan hi thawh sariha neih a ni dawn a, Manipur (60) chuan February 27 leh March 3-ah inthlanna an nei ang. Punjab (117), Uttarakhand (70) leh Goa (40) te chuan February 14 khian inthlan hi thawh khatah an zo dawn thung. Assembly constituency 690-a vote tlate hi March 10-ah chhiar an ni ang.