Covid vaccine pek chhuah kum khat champhaah PM-in health leh frontline worker-te inpekna fak

India rama Covid-19 vaccine pekchhuah runpui neih chu nimin kha a kum khatna niin, prime minister Narendra Modi chuan twitter kaltlangin hun harsa tak kara healthcare leh frontline worker-te inpekna a fak.

PM Modi chuan vaccine pek chhuah kum khatna tlin champha pual hian vaccination drive kalpuina kawnga inhnamhnawih zawng zawngte zahna a hlan tih a sawi. Chak taka vaccine pek chhuah a nih avangin mi tam tak nunna chhanhim a ni, a ti.

"Doctor, nurse leh healthcare worker-te inpekna hi a ropui takzet. Hmun kilkhawr taka chengte pawh vaccine pek an ni a, healthcare worker-ten vaccine-te hi an kensak zel a, an inpekna hi kan chhuang takzet a ni," tiin PM chuan a sawi.

Union health minister Mansukh Mandaviya pawhin India rama Covid-19 vaccination drive kalpui chu khawvela a hlawhtling ber tiin, health worker, scientist leh ram mipuite hnenah duhsakna a hlan bawk.

Covid vaccine hi nikum January 16 aṭang khan pek chhuah ṭan niin, kum khat chhung hian ram pumah dose vaibelchhe 156.76 pekchhuah hman a ni.