PM-in Kerala ṭanpuinaa ram mipuite thawhhona fak

Prime Minister Narendra Modi chuan thla tina radio-a programme a hman ṭhin, Maan Ki Baat vawi 47-na chu nimin khan a hmang leh. PM chuan tuilian vanga chhiatna nasa tak thlenna Kerala state pui tura theihtawp a chhuah zel tur thu leh, Kerala ṭanpuina tura ram mipuite thawhhona a fak thu a sawi.

PM Modi chuan ramin chhiatna a tawhah mipuite chu pumkhat taka an din thu a sawi a, "Fur ruahtui tam vangin ramchhung hmun hrang hrangah harsatna a thleng a, Kerala phei chuan chhhiatna nasa tak a tawh phah hial a ni. Kan thil hloh tawhte kan lalet thei lo a, mahse Kerala state leh a mipuite ṭanpui turin theihtawp kan chhuah zel dawn a ni", a ti. Ramchhung hmun hrang hrang mite chu an theih ang anga Kerala pui turin an thawk a, a bikin National Disaster Relief Force (NDRF) member-te chu an hna tlin taka an thawh avangin lawmpuina hlan a duh thu a sawi.

Modi chuan Indian Army, Navy, Air Force, BSF, CISF leh RAF-ten chhanchhuah leh chhawmdawl hna an thawh dan te chu fakawm a tih thu a sawi bawk.

Prime Minister hlui thi ta Atal Bihari Vajpayee zahna hlanin, Modi chuan Vajpayee chu India rama political culture kalphung thar siamtu a ni, a ti. Vajpayee-a prime minister laiin Council of Ministers zat tur pawh bihthlaih a ni a, anti-defection law pawh khauh zawkin a siam bawk a ni, a ti. London parliament hunbi mila budget pharh hun, tlai dar 5 ni ṭhin pawh Vajpayee-a kaihhruaina hnuaiah hian chawhma lamah sawn a nih thu a sawi.

PM chuan Parliament Monsoon Session neih zawh tak pawh sawilangin, rorel inkhawm ṭha taka neiin, Lok Sabha-ah Bill 21 leh Rajya Sabha-ah Bill 14 pass a ni, a ti. Session hlawhtling tak neih a nih avangin MP te zawng zawng a lawmpui thu a sawi.

Asian Games neih mekah India tana medal latu, Indian player-te a lawmpui thu PM Modi chuan a sawi bawk. India mipuite chu fitness ngai pawimawh turin a chah bawk.

Raksha Bandhan leh Janmahstani pualin Modi chuan mipuite duhsakna a hlan a, Sanskrit Day hmangtute duhsakna a hlan bawk a, Sanskrit ṭawng chuan Indian culture nen inzawmna thuk tak a nei a ni, a ti.

PM chuan hmeichhiate laka pawikhawihna thleng ṭhin tihtawp tuma theihtawp chhuah zel a nih thu leh, pawngsualtute ngaihnathiam an nih dawn loh thu a sawi. Hemi atan hian pawngsualtute hremna tur dan khauh zawk siam a ni a, court ṭhenkhat pawhin pawngsualtute thubuai hi rang taka ngaihtuahin hremna na tak tak an lo pe tawh tih a sawi.