DMK president turin Stalin-an nomination theh lut

Tamil Nadu-a eptu pawl lian ber, Dravida Munnetra Kazhagam (DMK) president M Karunanidhi a thih tak avangin party president post chelh tur hian a fapa leh a party working president, MK Stalin chuan nimin khan nomination a thehlut.

Karunanidhi hian hriselna ṭhat tawk loh vanga party kaihhruai hna a thawh ṭhat theih loh avangin Stalin hi kum 2017 January thla aṭang khan working president atan dah a ni. Karunanidhi a thih hnuah hian party president dinhmun hi Stalin leh a unaupa MK Alagiri ten an inchuh zui deuh nia sawi a ni. Minister hlui, MK Alagiri hi kum 2015 khan party duhdan kalha che a, ṭawngkam maw lo tak tak a chhakchhuah avangin Karunanidhi chuan party aṭangin alo hnawtchhuak tawh a, a thachhang dawltu atan Stalin hi a ruat zui ta a ni.

MK Alagiri chuan Stalin chu party working president-a dah ni mah se, hna a thawk tak tak lo niin a sawi. Stalin chuan a unaupa puhna hi chhangin, party working president-a dah a nih aṭang hian DMK tan chawl loin theihtawpin a thawk tih a sawi.