Punjab-in ruihhlo ngaite jail-ah a thawn zel

Ruihhlo ngai mante chu de-addiction-a dah tura danin a tih laiin, Punjab sorkar chuan ruihhlo ngai, drug addict a mante chu de-addiction centre-ah ni loin jail-ah a thawn zel niin think tank, Vidhi Centre for Legal Policy chuan a tarlang.

He zirchianna hi union law minister hlui Salman Khursid, Punjab and Haryana High Court Chief Jutice hlui Mukul Mugdal leh Additional Solicitor General hlui KV Vishwanathan-te hmuh laia pharh a ni. Ruihhlo ngaite hi a enkawlna hmuna dah lo a, jail-a dah luh zel hian sim phah aiin, ruihhlo tawlhrutuah an chhuah phah zawk niin a sawi. Addict te aiin ruihhlo zuartute chu bitum an ngai zawk niin a tarlang bawk.

Punjab sorkar hian an state-a ruihhlo hluar avangin ruihhlo dona kawngah hma a la mek a, sorkar hnathawkte pawh ruihhlo an khawih leh khawih loh test vek tur pawhin alo ti tawh bawk. State chhungah hian sorkar hnuaia ruihhlo ngai enkawlna 31 awmin heng zinga 26 chu an function a ni.