Covid-19 kai dam leh 60.72% an awm tawh Hri kai hmuh chhuah thar 20,903 awm

Covid-19 hripui lengin ziaawm lam a pan thei lo a, nimin khan hri kai hmuh chhuah tam ber ni thleng lehin hmuh chhuah thar 20,903 an awm a, ni khatah sing hnih hmuh chhuah tlin a nih vawi khatna a ni.

Hri len ṭan aṭanga nimin thleng khan mi 6,25,544 laiin hri an kai tawh a, heng zinga 3,79,892 hi enkawl dam tawh an nih laiin 2,27,439 chuan an la vei mek thung. Enkawl dam tawh rate hi 60.72% lai a ni tawh a, hri kai nasa takin pun belh mah se enkawl dam pawh an pung chak hle.

Ministry of Health and Family Welfare-in nimina report a tihchhuahah chuan darkar 24 chhungin mi 20,032 lai enkawl dam an awm a, enkawl dam pawh hi an pung chak hle. Hetihlai hian thihpui 379 lai an awm leh a, hri len 

ṭantirh aṭanga nimin thleng khan mi 18,213-in Covid-19 hi an thihpui tawh a ni. Indian Council of Medical Research (ICMR) chuan ram chhung laboratory hrang hrangah ni khatah Covid-19 sample 2,41,576 lai an enfiah tih sawiin hei hi nikhata sample an enfiah tam ber ṭum a ni. Hri len ṭan aṭanga nimin thleng khan sample 92,97,759 enfiah a ni tawh.

ICMR hian nasa takin hma an la reng a, nimin thleng kh-an sorkar laboratory 775 leh private laboratory 299-a sample test chu an pawmpui tawh a ni.

April 1 aṭang khan state, Union territory leh central institution hrang hrangah N95 mask vaibelcheh 2.02 leh PPE kit vaibelchhe 1.18 chuang a thlawnin sem a ni tawh tih union health ministry chuan a sawi. 

India rama siam, ventilator 11,300 pawh semchhuah a ni tawh a,heng zinga 6,154 chu hospital hrang hrangah hman a ni tawh a ni, a ti.  Hei bakah hian health ministry chuan state/UT te tan hian oxygen cylinder nuai 1.02 a pe chhuak tawh a, HCQ tablet vaibelchhe 6.12 sem a ni tawh bawk a ni.