Kerala CM-in Malayali-te thla khat hlawh thawh turin ngen

Kerala Chief Minister Pinarayi Vijayan chuan an state-in tuilian vanga chhiatna nasa tak an tawh mekah, khawvel ram hrang hranga Malayali hnamte chu ṭanpuina atana an thla khat hlawh pe ṭheuh turin a ngen.

CM chuan thla khat hlawh pe thei lote pawhin thla 10 chhung chu thla tin an nithum hlawh thawh turin a ngen bawk.

Facebook-a ngenna a siamah CM chuan, "Kerala din thar leh turin Malayali te chu ṭanrual a ngai a ni. Kerala chakna chu a sum bawm hi ni loin, khawvelin a thawhpuina zawk hi a ni", a ti.

Vijayan-a chuan tuilian leh leminin an state-a chhiatna a thlente din thar leh tur chuan cheng vaibelchhe 20,000 a ngai dawn niin a sawi. Hei hi state sorkarin kumin chhung atana sum hman tura a ruahman zat, Rs vbch 37, 248 zahve aiin a tam a, kumtina kawng leh lei siam leh enkawlna atana a sum hman aiin a let hnih zetin a tam bawk.

August 21 khan sorkar laipui chuan Kerala ṭanpuina atan hian Rs vbch 600 a pe chhuak tawh a ni.

August 8–16 chhunga Kerala state-in tuilan a tawrh hi kum za chhunga tuilian a tawrh nasat ber ṭum a ni a, chhiatna thleng vang hian mi 400 chuang an thi a, mi nuai riat vel chuan an in leh lo an tlanchhiatsan a ngai bawk. Thlai chinna ram hectare 40,000 chuang chu tuilianin a chim a, chenna in 26,000 vel a chhe bawk a ni. Kochi-a international airport runway pawh tuilianin a chim vang hian khar a ngaih phah bawk a ni.