PM Modi-an 2017-18 chhungin thilpek Rs nuai 12.57 man dawng

Prime Minister Narendra Modi chuan kum 2017 June leh 2018 June thla inkara ram hrang hrang a tlawhnaah thilpek 168 a dawng a, a thilpek dawn hlut zawng hi cheng nuai 12.57 niin Ministry of External Affairs data-ah tarlan a ni.

PM Modi-an thilpek a dawn zingah hian cheng nuai 1.10 man sana te, silver plaque Rs nuai 2.15 man leh Montblanc pen set Rs nuai 1.25 man te a tel. Hei bakah hian lemziak, lehkhabu, thalak leh bullet train model pawh a tel bawk. Mosque lem leh chemte Rs 20,000 man pawh a dawng tel.

Hemi hun chhung hian PM hian ram 20 a tlawh hman a, a ram tlawh zingah hian Israel, Germany, China, Jordan, Palestine, UAE, Russia, Oman, Sweden, UK, Indonesia leh Malaysia te pawh an tel a ni.

Sorkar official-ten ramdang an tlawh ṭuma thilpek an dawn, Rs 5,000 man ching chunglam chu an kawl zui a rem lo a, External Affairs ministry treasury-ah dah an ni ṭhin. Rs 5,000 man aia tlawm erawh chu an kawl phalsak an ni thung.