Bawng talh vangin Kerala-in hremna tawk: BJP MLA

Kerala state-in tuilian vanga chhiatna nasa a tawh avanga ram chhung mipuiten theihtawpa chhiat tawkte ṭanpui tura tha an thawh laiin, BJP MLA Basangouda Patil Yatnal chuan Kerala state chuan bawng talh a, Hindu sakhaw betute rilru an tih nat avangin hremna an tawk niin a sawi. MLA thusawi hian dem a hlawh zui hle.

BJP MLA chuan Hindu-te rilru an tinat vangin Kerala chuan tuna chhiatna rapthlak tak chu an tawh phah niin a sawi a, "Kerala-ah chuan ualau takin bawng te an talh a, a hnuah engnge lo thleng ta? Kum khat chhung lekin hetiang tuilian rapthlak tak hi a lo thleng ta a ni. Hindu sakhaw betute rilru tinatute chuan hetianga a nghawng ṭha lo tak hi an tuar zel dawn a ni", a ti.