Jharkhand-in Israel-ah loneitu 26 tir

Jharkhand Chief Minister Raghubar Das chuan Israel rama lo neih dan kalhmangte zir turin Pathianni khan an state-a loneitu 26-te chu Israel-ah a tir a, state official ṭhenkhatin an kalpui.

Loneitu zin turte a thlahnaah, CM Das chuan Israel rama an tihdan phungte chu uluk taka zir tur leh, an state-a hmang chhunzawm thei tura thiam turin a chah. Israel chu Jharkhand aia te zawk ni mah se, a sum lakluh chu India ram pum ai pawhin a sang zawk a ni, a ti. Jharkhand chuan thlai thar chungchangah state dangte la pha lo mah se, reiloteah an state khamkhawp an thar mai bakah state danga thawnchhuah khawp tur an la nei thuai dawn a ni, tiin CM chuan a sawi.

State mipuite chu lo neih bakah pisiculture, animal husbandry leh horticulture lamte ngaihven turin a chah bawk.

Jhakhand loneitute hi Israel-ah hian ni li chamin, bawng vulhna hmun, thlai leh thei chinna hmunte tlawhin drip irrigation chungchangte an zir dawn niin Agriculture Secretary Puja Singhal chuan a sawi.