IMCR-in August 15-ah Covid-19 Vaccine peih fel hman tum

Indian Council of Medical Research (ICMR) chuan Ningani khan Covid-19 vaccine, COVAXIN chu August 15-ah mipuite hman theih tura peih fel hman tum turin Bharat Biotech a hriattir. 

He damdawi siam­tu hi Hydereabad-based Bharat Biotech India (BBIL) an ni a, anni bakah ICMR leh National Institute of Virology (NIV) pawh an tel a ni. ICMR hian BBIL hnenah damdawi chu rang zawk leh chak zawka siam zung zung turin a chah a, clinical trial zawng zawng zawh tawh a nih chuan August 15-a peih fel hman turin a hriattir a ni. 

Ningani khan prime minister Narendra Modi kaihhruaina hnuaiah  vaccine hmuhchhuahna tura hma lak mek chungchangah  high level meeting neih a ni. Meeting-ah hian India-in Covid-19 damdawi a hmuhchhuah tumna kawnga hma a lo lak tawhna te thlir let a ni a, siam zawh fel a nih huna kalpui dan tur te pawh sawiho nghal a ni bawk. 

India bakah hian Astra­Zeneca, University of Oxford leh ram hrang hranga mithiamte chuan Covid-19 vaccine hmuhchhuah tumin hma an la mek a, Covid-19 hri damdawi tur mamawh­na hi a san em avangin hmuhchhuah tuma hna thawkte chu an hman­hmawh tlang hle a ni.