PM-in sawi lawk loin Leh-a India sipaite tlawh

Prime minister Narendra Modi chuan sawi lawk loin nimin khan Ladakh khawpui Leh-a India sipaite a tlawh. PM hi Chief of Defence Staff (CDS) General Bipin Rawat leh  Army Chief General Manoj Mukund Naravane-ten an ṭawiawm. 

Leh khuaa Nimo hmun chu nimin zing dar 8:15 khan an thleng a,14 Corps Commander Lieutenant General Harinder Singh chuan Nimo-a line of actual control (LAC)-a thil thleng leh an boruak tawn mekte a lo hrilhfiah. PM chuan Nimo-a Army, Air Force leh ITBP sipaite hmaah thu sawiin, tunhnaia Galwan Valley-a China sipaite kut tuara thi, sipai 20-te zahna hlanin an huaisenna chu hmun tinah sawi a la ni reng dawn a ni, a ti. India-in remna leh muanna a awm a duh laia China chet dan chu na taka sawiselin, mi chak lo zawkte chuan remna leh muanna an kalpui thei lo a, mi huaisen zawkten remna an siam ṭhin a ni, ati. 

June 15-a Galwan Valley-a India leh China sipai inbeihna avang khan India sipai 20 an thi a, hei vang hian India thinlung a dam thei lo a, Thawhṭanni khan Chinese app 59 lai a lo titawp lailawk tawh bawk. Hei bakah hian hnathawhna kawnga China inrawlh theihna turte chu India chuan a titawp chho mek zel bawk. Hengte avang hian ram pahnihte inkarah innghirnghona nasa zawk a awm chho ṭan a ni.