Kerala-in donation Rs vbch 713.92 a dawng tawh

Tuilian vanga chhiatna nasa tak thlenna, Kerala state chuan ni 14 chhungin chief minister distress relief fund (CDMRF)-ah mipuite hnen aṭangin ṭanpuina cheng vaibelchhe 713.92 a dawng tawh.

Ṭanpuina sum a dawn zingah cheng vaibelchhe 132.62 hi bank leh UPI kaltlanga a dawn niin, cheng vaibelchhe 43 chu PayTM leh online contribution hmanga a dawn a ni. Thawhṭanni ringawt pawh khan CMDRF hian ṭanpuina sum cheng vaibelchhe 5.6 a dawng a ni. CMDRF-a ṭanpuina pe duhte tan hian sorkar wesite https://donation.cmdrf.kerala.... kaltlangin a pek theih a ni.

Nikuma Kerala-in thlipui, cylcone Ockhi vanga chhiatna a tawhah khan CMDRF kaltlang hian ṭanpuina cheng vaibelchhe 104 a dawng a ni. Kerala hian sorkar laipuia thlipui tleh avanga loneitu harsatna tawkte chhawmdawlna turin cheng vaibelchhe 7340.45 dil mah se, sorkar laipui chuan cheng vaibelchhe 133 chauh a pe chhuak a ni.

Tun ṭuma tuilian vanga chhiatna an tawhah hian sorkar laipui chuan Kerala tan hian ṭanpuina cheng vaibelchhe 600 a pe tawh a, Prime Minister Narendra Modi chuan state Govenror P.Sathavisam hnenah hei hi an lo pek hmasak a nih thu sawiin, state sorkarin additional memorandum an thehluh chuan pawisa pawh pek belh theih an la ni tih a sawi.

Hetihlai hian union minister leh BJP MP-ten Kerala tuilian tuarte tan an thla khat hlawh pein, cheng vaibelchhe 25 chu CMDRF-ah an chhunglut nia thu thehdarh chu thu dik lo a nih thu thuneitute chuan an sawi.

Ramchhung leh rampawn aṭanga mi hrang hrangin Kerala ṭanpuina tur sum an thawh laiin, nimin khan Chandigarh-ah Panchkula-a CBI special judge chuan eiruknaa inhnamhnawihan puha thubuai siamsak mi pathumte chu Kerala Chief Minister's Distress Relief Fund atan hian Rs 15,000 ṭheuh pe turin thu a pe. Central exise and audit department-a superintendent hlui Anil Kumar leh Ajay Singh bakah inspector hlui Ravinder Dahiya te chu thamna cheng nuai thum dawnga puh an nih vangin man an ni a, heng mi pathumte chungthu hi Thawhṭanni khan Special CBI judge Jagdeep Singh chuan ngaihtuahin, an thubuai ngaihtuah a nih leh hun, October 1-ah tuilian tuarte tanpuina tur sum an pekna receipt hi a hmaa pharh ngei turin a ti a ni.

CBSE-in zirlaite digital certificate pe dawn
Central Board of Secondary Education (CBSE) chuan tuilian in an education certificate a tihchhiat, zirlaite tan digital certificate pekchhuah a tum. Hei hi an zir chhunzawm zelna atan an hman chhunzawm thei dawn a ni. Kerala-ah hian CBSE school 1,300 zet a awm a, heng school-a zirlaite hian marksheet, migration certitificate leh pass certificate-te chu CBSE digital academic repository, ''Parinam Manjusha'' aṭangin an lachhuak thei dawn a ni.

Rahul Gandhi-an Kerala tlawh
Congress president Rahul Gandhi chuan nimin khan ni hnih cham turin Kerala a tlawh. Europe aṭanga rawn haw hlim, Rahul Gandhi hian tuilianin chhiatna a thlen dante enkualin, relief camp-te pawh a tlawh kual dawn a, chhawmdawl hna thawhna kawnga puitu sanghamantute leh party volunteer-te a hmu bawk ang.

Gandhi hian Chengannur tlawh hmasa berin, Christian College leh Engineering College-a relief camp a tlawh a, hemi hnu hian Edanadu-ah relief camp a tlawh leh bawk.