India ramah Billionaire 40 awm thar; mirethei a letin pung : Oxfam

India rama mihausa tawntawte chu Covid-19 hripui len chhung hian an hausakna chu a letin a pung a, hetihlai hian miretheite dinhmun a tleu belh nasa hle thung a, sorkar chuan daihzai zawka an policy an ennawn a ṭul tih Oxfam Davos report, 2022 chuan a tarlang.

Ramchhungah hri leng thawh hnihna rapthlak tak avanga health infrastructure leh mitthi dahna leh ruang dahna hmunte awl awm lo khawpa hnawh khah vek an nih chhung khan, India ramah billionaire 40 an awm thar a, ramchhungah billionaire mi 142 an awm tling tawh a ni. An vaia hausakna tling khawm hi USD tluklehdingawn 720 hu a ni a, miretheite neihzat tlingkhawm aiin 40% chuangin a sang zawk tih zirchianna chuan a tarlang. India hian France, Sweden leh Switzerland belhkhawm ai pawhin billionaire an nei tam tawh zawk tih Oxfam chuan a sawi.

India ramah nikum May thla khan khawpui chhunga hnathawh tur nei lo chu 15% in an pung a, ei tur ṭha dawng lo pawh an pung a ni.

Kum 2016-a state policy aṭanga wealth tax tihtawp te, sorkara an chhiah chawi tur chhun luh loh te leh dan dik loa chhiah an pek ṭhinna te chu mihausate hausak belh chhan a ni a, hetihlai hian nikhata an hnathawkte an pek theih tlem ber, national minimum wage chu Rs. 178 ($2.4) a nih thu global report chuan a puang. Tualchhung inrebawlna atana Federal funding tihtlem leh health leh education sector lama ṭhanna sang zel vangin intluk lohna nasa tak a awm phah bawk.

India ramah hian taksa mamawh chaw ṭha dawng lo, khawvel puma awm zat hmun lia ṭhena hmun khat an awm tih Oxfam chuan World Food Programme-in a tarlang tih a sawi bawk. Sorkar chu mihausa 10% te chu an thilneih aṭanga 1% health leh education atan hmanna turin, dan siam turin an ngen a ni. "Vanduaithlak takin India sorkar hian mi hausate duhsak zawngin chhiah a khawn a, India rama chhiah rawn lutte hi mipui hamṭhatna tura siam a nih ngai loh bakah Covid-19 vangin harsatna hian zual lam a pan a ni" tiin report chuan a tarlang.

Covid-19 hripui a len hnu hian India rama chhungkua 84%-te pawisa lakluh a tlahniam a, sub-Saharan Africa-te nen rethei tam lamah a intluk tawk vel a ni. Kum 2020 khan retheihna chu a leta pungin mi rethei mi maktaduai 134 an awm belh a, Pew research chhutlawk ai pawhin a sang zawk tih Oxfam chuan a sawi. Nitin inhlawhfa, self-employed leh hnathawh tur nei lo te chu mahni intihlum tam ber an nih thu official crime data chuan a tarlang bawk a ni.

Gautam Adani chu India mi, nikum chhunga a hausakna pung nasa ber niin, khawvel pumah pangana a ni phak tih Bloomberg Billionaires Index chuan a tarlang. Kum 2021 khan USD tld 42.7 a lakluh belh a, a hausak zawng belhkhawm hi USD tld 90 hu a ni mek. Mukesh Ambani chuan USD tld 13.3 lakluh belhin, USD tld 97 a nei a ni.