Punjab Assembly inthlan ni tur sawn

Election Commission of India (ECI) chuan nimin khan Punjab assembly inthlan neih hun tur, February 14-a a lo ruat tawh chu February 20-ah a sawn.

Guru Ravidas Jayanti thleng tur avanga Punjab-a all party-ten inthlan ni sawn tura an ngenna chu ECI chuan ngaihtuahin, a hun hi a sawnsak ta a ni.

ECI chuan thuchhuah siamin, "State sorkar, political party leh pawl hrang hrangte hnen aṭangin February 16-a Guru Ravidas Jayanti lawmna neih tur avanga inthlan hun sawn tura ngenna hi kan dawng a ni. A lawmna hmang tur hian a hma kar khat aṭangin devotee tam tak chuan Varanasi lam an pan a ngai dawn a, hei vang hian mi tam tak vote thlak thei loin an awm phah dawn tih an sawi a ni," a ti. 

An ngennate hi ngun taka an ngaihtuah hnuah, state sorkar leh chief electoral officer, Punjab thurawnte an lak hnuah Punjab Legislative Assembly inthlan neih ni tur chu sawn an remti ta tih an tarlang.