Rahul Gandhi-an Kerala tana sum pek a duhkhawp lo

Congress president Rahul Gandhi chuan Kerala-a tuilian in chhiatna a thlenna hmun hrang hrangte a tlawh kual a, tuilian vanga relief camp-a awmte a kawm bawk. Rahul Gandhi chuan Kerala ṭanpuina atana sorkar laipuiin sum a pek chu a duh khawp lo tih sawiin, tuilian tuartute pawh zangnadawmna pek ngei a phut thu a sawi.

Nimina Kochi-a press conference a neihah, Rahul Gandhi chuan Kerala-ah chuan tuilian tuartute leh, ruahsur nasain chhiatna dang a thlen tuartute an thlawpna leh, an tana theihtawp an chhuah zel dawn tih lantir tura kal a nih thu a sawi. Chhiatna thleng tuarte dinhmun hriatpui tur chauha kal a nih thu sawiin, he thil hi politicise a tum loh thu a sawi.

Relief camp hrang hrang a tlawh kual a, heng hmuna awmte chuan an awm zel dan tur pawh an hriatthiam loh thu an lo hrilh. Gandhi chuan Kerala Chief Minister pawh a biak thu sawiin, sorkar chuan tuilian vanga an in leh lo chante chu an in te a sakṭhat sak leh a, zangnadawmna pawh a rang thei anga pek chhuah ṭul a tih thu a sawi.

Sorkar laipuiin Kerala ṭanpuina atana cheng vaibelchhe 600 a pek chu a la tawk lo hle nia sawiin, chhiatna nasa tak an tawh aṭanga indinthar leh tur chuan Kerala chuan sum tam zawk a mamawh a ni, a ti.

Rahul Gandhi hian ni hnih cham turin Thawhlehni khan Trivandrum a thleng a, tuilenna hmun hrang hrangte tawlhin, tuilian tuarte chhanchhuah leh chhawmdawl hna thawh a nih dante a enpui a ni. Chengannur-ah relief camp tlawhin, tuilian tuar chhungkaw ṭhenkhatte a kawm. Kochi-a Marine Drive aṭanga chhawmdawlna phurtu truck tlanchhuak turte a vailiam bawk.

Hemi hma hian hruaitu hrang hrang–Prime Minister Narendra Modi, Union Home Minister Rajnath Singh leh Defence Minister Nirmala Sitharaman te chuan Kerala state hi an lo tlawh tawh bawk.

Tuilian vanga kar hnih dawn Kochi-a international airport khar pawh nimin chawhnu dar 2 aṭang khan hawn a ni leh ta. Tuilian hian airport runway hi a chim vangin khar a ni. Cochin International Airport (CIAL) official chuan tuilian vanga hun rei tak chhung airport khar a ngaih vanga sum hloh chu cheng vaibelchhe 220 a tling niin a sawi. Runway, taxi-bay, duty-free shop leh terminal te pawh tuilian hian a chim a, electrical equipment te a tichhe bawk a ni. Cheng vaibelchhe 60 man solar power sytem pawh a chhe tel a ni. He airport hi ramchhunga airport lun pasarihna niin, kum 2017-2018 chungin khualzin lut leh chhuak maktaduai 10 zet an awm a ni.