Moaist nena inzawmna neia puh activist panga man

Maharashtra police-te chuan Thawhlehni khan khawpui hrang hrangah Maoist hel nena inzawmna neia puhin human rights activist panga an man. An mi mante hi Sudha Bharadwaj, Gautam Navlakha, Arun Ferreira, Vernon Gonsalves leh P Varavara Rao-te an ni.

Activist panga-te hi Moaist-te nena inzawmna nei puh an ni bakah, kumin January thlaa Bhima Koregaon-a tharum thawhna thlenga inhnamhnawiha puh an ni.

Police-ten activist-te an man hnu, Thawhlehni vek khan historian Romila Thapar leh midang pali-te chuan an mi mante chhuah phut hian Supreme Court-ah petition an thehluh nghal a, nimin khan petition hi ngaihtuah a ni. Petition thehluttu te chuan SC hnenah hian he thil thleng chungchang hi chhui chiang tura phutin, activist mante chu sorkar sawiseltute rahbeh tumna niin an sawi.

Mahse Maharashtra police-te chuan Bhima Boregaon-a tharum thawhna thleng chungchang an chhuinaah, heng activist panga-te hian inhnamhnawihna an neih avanga man an nih thu an sawi a, an kut aṭang hian document pawimawhte pawh an man tel niin an sawi.

Police-te chuan an mi mante hi IPS Section 153-A, 505, 117 leh 120-B hnuaiah thubuai siamsak an nih thu a sawi.