Kerala all-party aiawh ten Rajnath Singh hmu

Kerala-a all-party aiawhten nimin khan Union Home Minister Rajnath Singh an hmu a, an state tana ṭanpuina sum tam zawk pe tur leh, ramdangin puih an tumna pawh phalsak turin an ngen.

Nimina Rajnath Singh hmutu zingah hian Congress, CPI-M, RSP, Kerala Congress (Mani) leh Independent MP 11 an tel bawk.

Congress hruaitu leh Defence Minister hlui AK Antony chuan, "Party hrang hrang ni mah ila, Kerala din thar a nih theihna turin lungrual takin ke kan pen a ni. Sorkar laipui aṭangin ṭanpuina sum tam zawk kan beisei a, home minister hnenah pawh ramdang puihna dawng lo tura khuahkhirhna siam chu thlahdul turin kan ngen bawk a ni. Home Minister chuan hemi chungchang hi External Affairs Minister Sushma Swaraj-i lo sawipui min tiam a ni," a ti.

Sorkar laipui chuan Kerala tuilian tuarte ṭanpuina tur hian cheng vaibelchhe 600 a pechhuak tawh a, Prime Minister Narendra Modi leh home minister-te hian an tlawh tawh bawk.

Ruahsur nasa vanga tuilian leh leimin Kerala state-a chhiatna a thlen leh an thil hloh hi cheng vaibelchhe 20,000 hu a tling nia chhut a ni a, mahse Chief Minister Pinarayi Vijayan chuan he ai hian a tam zawk niin a sawi thung. August 8 aṭanga tuilian vang hian mi 483 in nunna an chan a, thil tam tak tuilian hian a lenchhe bawk.

Tuilian vanga relief camp hrang hranga awmte pawh an in lamah an kir leh tan tawh. August 21 thleng khan relief camp-ah hian mi nuai 14.50 vel an awm a, mahse a tam zawk chu an in lamah kir tawhin, tuna camp-a la awm chu mi 98,000 vel an ni.