Lalu Yadav court-ah a inpe

Bihar chief minister hlui leh Rashtriya Janata Dal (RJD) hotu Lalu Pradad Yadav chu court-in a bail pawhsei a ngenna a hnawlsak tak avangin nimin khan Jharkhand High Court thupek angin court-ah a inpe.

Kum 70 mi, Lalu Yadav hi nikum December thla khan a chief minister laia ranchaw man tam tham tak tihchingpen thubuaiah thiam loh chantir a nih vangin man a ni. Kumin May thla khan bail-a chhuah a ni a, damdawi-inah a inenkawl niin court hnenah hian thla thum dang a bail hi pawhsei sak turin a ngen a ni. Mahse Jharkhand High Court chuan a ngenna hi hnawlsakin, August 30-ah jail-a lut leh turin a ti a ni. Lalu chuan, "Ka hriselna ṭha tawk lo hle mah se, cour thupek ka zawm dawn a ni", a ti.

Lalu-a ukil senior lawyer Abhishek Manu Singhvi chuan Lalu hi a hriselna ṭha tawk lo leh, enkawl zui a la ngaih vangin bail hi pawhsei sak turin a dil a ni. Mahse he dilna hi Central Bureau of Investigation (CBI) chuan dodalin, Lalu hian inenkawl turin thla thum bail-in a chhuak tawh tih a sawi. Bail-a chhuah a nih chhung hian Lalu hi Ranchi-a RIMS hospital, New Delhi-a AIIMS leh Mumbai hospital-ah te nat hrang hrang vangin enkawl a ni.