Salahuddin-a fapa man

National Investigation Agency (NIA) chuan nimin khan Srinagar-ah Hizbul Mujahideen (HM) firfiak pawl hotu Syed Salahuddin-a fapa, Shakeel an man.

NIA official-te chuan Shakeel hi nimin zing khan Rambagh-a a chenna inah an man a ni. Shakeel hi Hizbul hotu, Salahuddin-a fapa pahnihna niin, SKIMS Soura-ah senior lab technician a ni.

Hetihlai hian inlakhran duhtu pawlten nawrh huaihawt an tum avangin Srinagar-ah hian punkhawm khapna dan hman a ni. Inlakhran duhtu pawl, Syed Ali Geelani, Mirwaiz Umer Farooq leh Muhammad Yasin Malik kaihhruaiin Joint Resistance Leadership (JRL) te chuan August 30 leh 31 hian article 35A humhalh phutin nawrh hi an huaihawt a ni. He article tihbo phut hian Supreme Court-ah petition eng emaw zat thehluh a ni a, hei hi vawiin hian ngaihtuah a ni ang.

Nawrh huaihawt a nih vang hian University of Kashmir chuan entrace exam neih hun pawh a sawn vek a ni. Srinagar khawpui chhung hmun hrang hrang leh, Kashmir Valley-ah venhim hna thawk tur hian police leh paramilitary force ṭhahnem tham tak dah a ni.

Nilaini khan Hizbul Mujahidden firfiak pahnih, Altaf Ahmad Dar leh Umar Rashid Wani-te chu security force-te nen an inbeihnaah kahhlum an ni. Jammu and Kashmir-a Anantnag district-a Khanabal area-ah firfiak pahnihte hi kahhlum an ni.