BIMSTEC summti hmang turin PM a zin

Prime Minister Narendra Modi-a chu nimin khan Bay of Bengal Initiative for Multi-Sectoral Technical and Economic Cooperation (BIMSTEC) Summit hmang turin Nepal a thleng.

Ni hnih awh tur 4th BIMSTEC Summit hi Katmandu-ah neih a ni. PM hi Tribhuvan International Airport-ah Nepal Deputy Prime Minsiter leh Defence Minister Ishwor Pokhrel-an a lo hmuak. Modi hian PM a nih hnua Nepal a tlawh ṭum li-na a ni.

Nepal pana a chhuah hmaa chanchin thar lakhawmtute a kawmnaah, PM Modi chuan Summit chhung hian BIMSTEC hruaitute kawmin, thawhhona nghet zawk te, sumdawnna lama thawhhona tihzauh dan te a sawipui dawn tih a sawi. Nimin khan summit kar lakah Sri Lanka President Maithripala Sirisena leh Bangladesh Prime Minister Sheikh Hasina-te a hmu.

Modi hian vawiin-ah hian Nepal Prime Minister KP Shamra Oli nen Pashupatinath temple complex-ah Nepal Bharat Maitri Dharmashala an hawng nghal dawn a ni.

BIMSTEC hi kum 1997, June 6-a din a ni a, he pawlah hian Bay of Bengal chhehvel ram pasarih–Bangladesh, Bhutan, India, Myanmar, Nepal, Sri Lanka leh Thailand an tel. BIMSTEC member ram pasarih-ah hian mi tluklehdingawn 1.5 chengin, hei hi khawvel puma mihring awm zat aṭanga 21% a tling a, an GDP belhkhawm hi dollar trillion 2.5 a ni.