R-Day : Delhi-ah Facial Recognition System hmang dawn
Republic Day lawmna tura inbuatsaihna kal mek karah Delhi police-ten Ghazipur Flower Market-ah improvised explosive device (IED) hmuchhuakin an sut nghal a, hei vang hian Delhi khawpuiah venhimna lam pawh tihkhauh nghal a ni.
Delhi Police-te chuan Republic Day lawmna tur hmun, Rajpath leh a chhehvelah venhimna tichhah nghalin, facial recognition systems (FRS) leh CCTV 300 chuang an bun belh.
Deepak Yadav, DCP, New Delhi chuan firfiaka chet tumna piah lam bakah Covid-19 hri kai pung mek chu an tan buaipui tham tak a ni tih a sawi. Police-te chu fimkhur dan tur te, venhimna kawnga hmalak dan turte sawipuin , New Delhi-ah security arrangement khauh zawka siam a ni.
"New Delhi hnaiha hotel-a lut leh chhuakte uluk taka enthlithlai an ni. Boruak danglam tak a thlen palh thulhah Quick reaction team (QRT)-te chu tirhchhuah mai theih turin an awm bawk ang. Boruaka chevel enfiah turin anti-drone team rawih an ni bawk," a ti.
Rajpath bul velah hian camera 300 leh FRS-enabled facility dah belh an ni. He khawl hian thil sual titu mi 50,000 te nihna, database neiin awlsam takin an zawnchhuah phah thei dawn a ni. "Covid-19 kaihhnawiha inkhuahkhirhna vangin ticket lei tur chu 4,000 chiah a awm thei dawn a, a hmunah hian mipui 24,000 chauhin an chhim thei dawn a ni," tiin official chuan a sawi.
Kumin Republic Day lawmna neih turah hian a kum hnihna atan ramdang hruaitu khuallian an awm dawn lo. Central Asia ram panga hruaitute chu chief guest atan hian sawm ni mah se, anmahni lam hian thuchhuah engmah an la siam lo a ni.
Kum 75 chhunga a ṭum khatna atan parade ṭan tlai dawn
Kum 75 chhunga a ṭum khatna atan, kumin Republic Day parade chu zing dar 10-ah ni loin dar 10:30-ah ṭan a ni dawn.
Kumtinin Republic Day parade hi zing dar 10-ah ṭan a ni ziah ṭhin a, mahse kuminah chuan Covid-19 kaihhruaina dante zawm a ngaih vang leh, Jammu and Kashmir-a sipai nunna chante zahna hlanna turin minute 30-in tihtlai a ni. Parade erawh chu nikum ang bawkin minute 90 neih a ni ang.
Prime minister Narendra Modi-a'n India Gate bula National War Memorial a tlawh hmasa ang a, hemi hnu hian March past neih niin, tableau-te entir a ni zui ang. Tableau-te hi Red Fort thleng an kal dawn a, hetah hian mipuite thlir theih turin an ding zui ang. Marching contigent-te chu National Stadium-ah an tawp thung dawn a ni.
Delhi-a Covid-19 kaihhruaina dante siam a nih avangin, Republic Day-a cultural event-a tel tur artist-te chu midang bula an awm phal a ni lo a, hri laka an him theihna turin an chuanna motor-te pawh kap thianghlimin khung hran vek an ni ang.