March aṭangin kum 12-14 tan vaccine semchhuak thei dawn : NTAGI chief

India rama tleirawl, kum 15-17 inkar te'n Covid vaccine dose kima an lak zawh hnuah kum 12-14 inkar tan March thla aṭangin Covid-19 vaccine an pechhuak thei dawn tih National Technical Advisory Group on Immunisation (NTAGI) chairman N.K. Arora chuan Thawhṭanni khan a sawi.

N.K. Arora chuan kum 15-17 inkar mi tluklehdingawn 7.4 zinga tld 3.45 te chuan Covaxin dose khatna an la tawh a, ni 28 hnuah dose hnihna an la thei dawn a ni, a ti. "Tleirawl vaccine la thei kum bithliah china awmte chuan tluang takin vaccine an la thei a ni. Tun anga kan pechhuak zel thei a nih chuan kum 15-17 inkar te chuan January thla tawp lamah dose khatna an la kim hman dawn a, chutiang bawkin dose hnihna chu February thla tawp lamah an lak theih kan beisei a ni" a ti. Kum 15-17 inkarte pek zawh theih hunah chuan sorkar hian March thla aṭangin kum 12-14 inkar tan vaccine semchhuah hna kan kalpui leh thei dawn a ni. Kum 12-14 inkar hi ramchhungah mi tld 7.5 vel an awm mek tih Arora chuan a sawi.

Thawhṭanni zinga Provisional vaccination report tarlan danin, darkar 24 liamta chhung khan mipui nuai 39 hnenah vaccine pekchhuah a ni a, vaccine la tawh hi tld 157.2 an awm mek a ni. Sorkar data chuan naupang kum 15-17 inkar zinga tld 3.45 chuangin dose khatna an la tawh tih a tarlang bawk.

India chuan Covid-19 dose thumna, precaution dose tiha sawi bawk chu ramchhunga hri kai pung zel leh Omicron variant thar vangin healthcare leh frontline worker, election duty, kum 60 chunglam natna benvawn nei te hnenah January 10 aṭang khan a pechhuak ṭan bawk a ni.