SC-in Article 35A ngaihtuah hun nakkum atan sawn

Supreme Court chuan nimin khan Constitution Article 35-A chungchanga ngaihtuah ṭha tura petition thehlutte chu nakkum January thlaa ngaihtuah turin a ti.

Sorkar laipui leh Jammu and Kashmir sorkar chuan J&K state-a local body inthlan a awm dawn avangin Article 35A khin letna ngaihtuah hun hi sawn hla turin a ngen a ni. Chief Justice of India Dipak Misra kaihhruai judge pathum awmna bench hnenah J&K sorkar chuan Article 35A chungchanga debate leh sawihona neih chuan an state chhunga dan leh thupek lam thlengin nghawng a nei dawn niin a hrilh a ni. Hei vang hian inthlan neih zawh hnuah ngaihtuah tura a duh thu a hrilh.

Article 35A hi 1954 Presidential Order hmangin Constitution-ah hian telh a ni a, he article hnuaiah hian Jammu and Kashmir mite chu an state chhunga in leh lo neihna kawngah dikna chanvo leh hamṭhatna bik pek an ni a, an state-a hmeichhiate chu state pawn lam mi pasala an neih chuan an ram nei tura an chanvo neihte hlihsak nghal an ni bawk. Hmeichhe tam tak chuan property chungchanga an chanvo neihte an chan phah a ni. Hei vang hian he article hi tibo tura phutin Supreme Court-ah hian petition thehluh a ni.

Supreme Court-a Article 35A khinletna duh lohna lantir hian inlakhran duhtu pawlte chuan Ningani leh Zirtawpni khan state pumah nawrh an huaihawt a, hei vang hian hmun ṭhenkhatah chuan buaina a chhuah venthawn thilah CrPC section 144 hman a ni. Inlakhran duhtu pawl hruaitu ṭhenkhat chu house arrest-a hren an ni bawk.