IRCTC scam: Rabri Devi leh a fapa bail-a chhuah phalsak

Kum 2009-a IRCTC hotel maintenance contract pek dana thil dik tawk lo awma inhnamhnawiha puh, Lalu Yadav Prasad-a nupui, Bihar Chief Minister hlui Rabri Devi leh a fapa RJD hruiatu Tejashswi Yadav-te chu nimin khan Delhi-a Patiala Court chuan bail an dilna a phalsak.

Rabri Devi leh a fapa, Tejaswhi te bakah he thila inhnamhnawiha puh dangte pawh bail hi phalsak an ni a, mahse bail-a chhuahna tur intiamkamna neihtir an nih bakah cheng nuai khat ṭheuh dah kham tir an ni bawk.

Hetih lai hian CB chuan he thubuaia inhnamhnawiha puh zinga mi, RJD hotu Lalu Prasad Yadav-a laka production warrant tichhuak turin court a ngen. Mahse Lalu hi Ranchi-ah hren mek a nih vangin Patiala House Court-ah hian a inlan ve thei lo a ni.

Nimin zin khan Rabri Devi leh a fapa Tajwashi-te hi court-ah hian kalin bail dilna hi an thehlut a ni. He thubuaiah hain Lalu-a thawhpui ṭhin, PG Gupta leh a nupui Sarla Gupta, Lala Projects firm leh midangte pawh inhnamhnawiha puh an ni bawk.

He thubuai hi Lalu-a Union Railway minister a nih laia thleng a ni a, kum 2006 khan Ranchi leh Puri-a IRCTC hotel siamna tur contract chu private firm hnenah pek niin, he contract hmuh theihna atan firm hian Patna district-a sumdawnna hmun turin ram acre thum-a zau chu thamna atan an pe nia sawi a ni. Enforcement Directorate (ED) chuan Lalu Yadav leh IRCTC official-te hian Kochhars firm, Sujata Hotel Private Limited hnena railway hotel enkawlna tur contract pekna atan hian an thuneihna an hmang sual niin a puh. April thla khan CBI chuan IRCTC contract dik lo taka pekchhuah nia sawi chungchangah hian mi 12 leh company pahnih lakah thubuai a ziaklut a ni.