Tlabung RD Block siam an phût
Tlabung RD Block Demand Committee (TRDBDC) chuan, Tlabung RD Block siam an duhna lantir nan September 1, Inrinni khan Tlabung Bazara Bungkawnah punkhawmna (rally) an huaihawt a, Tlabung leh a chhehvel khaw mi ṭhahnem tak an pungkhâwm.
Tlabung RD Block siam a nih loh chuan kumina Assembly inthlanpui 'boycott' tura an inpeih thu an tarlang.
Punkhawmna hi TRDBDC finance secretary Vanlalruata Sailo-in a kaihruai a, pro. pastor H Lalfakzuala'n hunserh a hmang. TRDBDC secretary Vanlalhriatpuia'n an hmalak dan tlangpui sawiin, TRDBDC chu V/C leh tlawmngai pawl hrang hrang, zirlai pawl leh political party aiawhte'n August 17, 2018-a an din a nih thu a sawi.
TRDBDC Secretary chuan, Tlabung RD Block a pian theih nan a ṭùl ang zelin mipui tel ve theihna tura hmalak zel tum tih a sawi a; September 11, 2018 khian Tlabungah kawngzawh an tum bakah, sorkarin hmalakna a nei lo zel a nih chuan, September 18, 2018-ah India leh Bangladesh inrina ramri bulah an lungàwi lohna lantir tura punkhâwm an tum thu a sawi bawk.
Punkhâwmnaah hian, Tlabunga pawl hrang hrang pariat hruaitute'n thu an sawi a; TRDBDC assistant secretary C Lalrintluanga chuan, Tlabung chu sorkara thuneitute'n an duh duha an tih kual tur an ni bik lo tih sawiin, "Sorkar hian a duh chuan thil a ti thei. Hetiang a nih laia vawiin thlenga RD Block headquarters min la pe lo hi inhmuhsitna leh inthamlohna a ni," a ti.
TRDBDC Assistant Secretary chuan, "RD block kan hmuh theihna tur a nih phawt chuan police tiang thleng pawha hmachhawn turin kan inpeih a ni," a ti a; sorkarin Tlabung RD Block a siam lo a nih chuan, kumina Assembly inthlanpui awm turah pawh West Tuipui biala inthlan kalpui a nih ve lohna turin theihtawp chhuah an tum thu a sawi.
Rally-ah hian mipuite chu au rual bakah, thu chi hrang hrang ziahna placard an keng a; resolution 'RD Block headquarters pêk kan nih hma chu Tlabung leh a chhehvel mipuite hian kan bei zel dawn a, kumina Assembly election pawh a ṭûl a nih chuan boycott turin kan inpeih a ni,' tih chu an pass a ni.