PM-in India Post Payments Bank a hawng

Prime Minister Narendra Modi chuan kar kalta Inrinni khan New Delhi-a Talkatora Stadium-ah India Post Payments Bank (IPPB) a hawng.

PM Modi chuan nitina postman-te hnathawh chu fakin, IPPB avangin an pawimawhna belhchhahin a awm dawn a ni, a ti. "Postman-te chu lehkhathawn leh parcel-te min pe ṭhintu tiin hriat an hlawh ṭhin. Mahse tunah chuan heng chauh hi loin banking leh financial service thlengin an kawp tawh dawn a ni. IPPB kaltlang hian ramchhung hmun tin kan dapchhuak thei dawn a, mitin tan an kawngka bul ngeiah bank leh banking service pek an ni tawh dawn a ni" a ti.

IPPB hian ramchhungah branch 650 leh Access Points 3250 a nei dawn a, post office nuai 1.55 te chu kumin December 31-ah chuan IPPB system nen thlunzawm vek hman tum a ni. Service hrang hrang a pek tur zingah hian savings leh current account, money transfer, direct benefit transfer, bill leh utility payment bakah enterprise leh merchant payment-te pawh a tel.

India Post Payments Bank (IPPB):
IPPB hi banking organisation angin a ding dawn a, mahse a huam chin erawh a zim zawk thung ang. Banking operation hrang hranng pawh a ti thei dawn a, mahse loan leh credit card erawh a pe chhuak ve thei lo ang.

Reserve Bank of India in inkaihruaina a siam anign IPPB hian customer hnen aṭangin deposit Rs nuai khat thleng a dawng thei a, hei bakah hian payments and remittance services, mobile payments/transfers/purchases bakah banking services dang ATM/debit cards, net banking and third-party fund transfer te a ti thei bawk.

Bank hian saving accounts-ah 4% interest a pe dawn a, loan leh insurance-ah PNB leh Bajaj Allianz Life Insurance te a thawhpui ang. Rs nuai khat chuang deposit chu automatic-in saving account-ah a indah nghal ang.

Aadhaar card hmangin account hi hawn theih a ni dawn a, transaction leh payment-ah QR card leh biometric hman a ni ang a, postman-te chu biotmeric device hmantir an ni ang.

Bank neitu hi sorkar niin, Department of Posts hnuaiah a function dawn a ni. Cabinet chuan IPPB atana hman tur hi 80% a tihsan a remtihsak bawk.