Congress-in Rafale contract chungchang sawifiah turin PM phut

Congress party chaun Prime Minister Narendra Modi chu fighter jet 36 leina tur contract chu ni 12 chauha upa company hnena pek a nihna chhan sawifiah turin a phut.

Congress party chuan fighter jet 126 a mamawh a nih laiin, PM Modi-a kaihhruai sorkar chuan aircraft 36 leiin France company Dassault Aviation chu inremna a siampui niin a sawi. Party thupuangtu Priyanka Chaturvedi chuan thil hmanhmawhthlak tak a nih chuan engvangin heng aircraft a order-te chu France company hnenah hian ṭum khatah supply tura a ngen mai loh, tiin a zawt let bawk.

Priyanka Chaturvedi chuan aircraft hi kum 2019-ah pakhat supply in a bak chu kum 2022-a supply tura tih a ni. Thil hmanhmawhthlak a nih chuan engvangin nge kum 2019-a supply vek tura a tih mai loh tiin a zawt.

Chaturvedi-i chuan contract pek dan hi dik taka kalpui nia an sawi ang hi a nih chuan, engvangin nge sorkar chuan Joint Parliamentary Committee (JPC) chhui chian chu a hlauh tlat a ti bawk. "Aircraft hi 126 lei tura dil a nih laiin, NDA chuan 36 leina tur inremna a ziak a, hei hi thil mak tak a ni", a ti. Hei bakah hian aircraft pakhat man Rs vbch 526 aṭanga Rs vbch 1,670-a a kai chho dawrh chhan chu hriatchian an duh tih a sawi bawk.

Prime Minister chuan a kaihhruai sorkarin kum 70 zet record ṭha tak lo nei tawh, public sector undertaking ngaihthah a, ni 12 chauha upa, tawnhriat pawh engmah la nei lo company hnenah contract pek a nihna chhan hi a sawifiah a ngai a ni, tiin Congress party thupuangtu chuan a sawi.