Telangana CM-in sector hrang hrang tana scheme siam a puang

Telangana Chief Minister K Chandrasekhar Rao chuan nimin khan an state-a sector hrang hrang tana scheme a siamte a puang a, heng zingah hian loneitute puala siam Rythu Bandhu or direct cash transfer scheme pawh a tel.

Rythu Bandhu or direct cash transfer scheme hnuaiah hian loneitute chuan season tinin ram acre khat zelah Rs 4000 an dawng thei dawn a, heng sumte hi state sorkar chuan Rabi season hmain a pawisa faiin a pechhuak dawn a ni. He scheme atan hian sorkar chuan cheng vaibelchhe 12,000 a dah a, heng zinga cheng vaibelchhe 6,000 chu loneitute bank account-ah dahsak an ni tawh bawk.

Kumin June thla khan Telangana ṭhenawm, Andhra Pradesh Chief Minister K Chandrababu Naidu chuan Dalit pual housing scheme siama hamṭhatna an dawn theih zat a lo tipung tawh awk a, hei bakah hian power a thlawna an dawn theih zat chu unit 50 aṭangin unit 100-ah a tisang bawk.

Kumin kumtawp lama assembly inthlan neih tur thlirin KCR chuan Telangana loneitute tan insurance scheme a puang bawk a, loan ba cheng nuai hnih chin ngaihdam sak an nih rin a ni. Kum 2014 inthlan dawna a lo tiam tawh angin loneitute hi an loan ba cheng nuai khat chin ngaihdam sak an ni tawh a, hemi atana kum li chhunga sorkarin sum a sen chu cheng vaibelchhe 17,000 zet a tling.

Telangana CM hian Inrinni khan electricity department-a thawktute hlawh 35% a tihsan a nih tur thu a lo puang tawh bawk a, an hnathawh leh inpekna te a theihnghilh sak lo tih a sawi rualin, amah chu theihnghilh bik lo turin thawktute chu a ngen nghal bawk.