Covid test tlahniam, test tam zawk kalpui turin state-te ngen

Covid-19 test ngai lo tur chin huang a zauh hnuah, sorkar laipui chuan ram chhunga coronavirus test zat a tlahniam chak hle tih sawiin test tam zawk kalpui leh turin state-te a ngen.

State leh Union territory hnena lehkha a thawnah, Union Health Ministry-a additional secretary Arti Ahuja chuan area ṭhenkhata test aṭanga hri kai hmuhchhuah tamna hmunah test tam zawk nei tur leh an thuchhuah ngai pawimawh turin a ti a ni.

World Health Organization (WHO)-in variant of concern-a a puan, Omicron variant chu ramchhungah chak takin a darh mek tih sawiin, "ICMR portal data aṭanga kan hmuh angin, state leh union territory-ah test hi a tlahniam a ni," a ti.

Indian Council of Medical Research (ICMR)-in test kalpui dan tura an thuchhuah thar ber January 10-a an tihchhuahah khan, test neih hi hri kai inkhunghranna tur leh inenkawlna ṭha ber a la nih reng thu an tarlang. Hei bakah hian, hripui hmachhawn nan test neih chu a la pawimawh reng thu sawiin, hri inkaichhawn tamna hmunah containment zone, contact tracing, quarantine, isolation leh follow-up neih dan tur awlsam leh rang zawk an neih theih phah tih a sawi.

Ahuja chuan, "Severe category an pumpelh theih nan high risk leh natna benvawn neite tan chak zawkin test neih hi a ngai a ni," tiin hri kai natna lang chhuak te chu test an ni ang a, laboratory-in hri an kai tih an nemnghet a, at-risk contact-te chu test an ni dawn a ni, a ti.

Kar hmasaa ICMR-in kaihhruaina a tihchhuahah chuan Covid-19 hri kai primary contact pawh ni se, symptom nei lo te chu test kher an ngai lo a, hei bakah hian home isolation-a awmte pawh an inkhung hun a tawp hnuah leh, Covid-19 facility-a awmte pawh an chhuah dawnah test kher ngai loin, state inkara zin veivakte pawh test kher an ngai tawh lo a ti. Mahse Health Ministry chuan test hi tam zawka kalpui leh turin state hrang hrangte chu a rawn ngen leh ta thung a ni.