Jan 27-ah PM Modi-a'n India-Central Asia Summit kaihruai dawn

Prime minister Narendra Modi chuan January 27 hian virtual hmangin India-Central Asia Summit hmasa ber chu a kaihruai dawn tih ministry of external affairs chuan a tarlang.

He summit-ah hian Kazakhstan, Kyrgyz Republic, Tajikistan, Turkmenistan leh Uzbekistan president-te an tel dawn a ni.

MEA chuan India-Central Asia Summit hmasa ber neih a ni tur hi India-in Central Asia ramte a thawhpuina ngheh chhoh zel zia lantirna a ni, a ti.

PM Modi hian kum 2015 khan Central Asia ramte hi a lo tlawh kim tawh a, thawhdunna tura inbiaknate pawh a lo neihpui tawh hlawm a ni. Kum 2021, December 18-20 khan New Delhi-a India-Central Asia Dialogue, Foreign Ministers level neih a lo ni tawh bawk a, hei hian heng ramte inzawmna siamṭhatna kawngah pawh nghawng ṭha tak a neih thu MEA chuan a sawi bawk. Summit neih turah hian regional leh international kaihhnawih thilte, a bikin regional security chungchangte an sawiho ang.