Kerala: Bawhhlawh thenfai hna hautak ; US-a inenkawl turin Kerala CM zin

Kerala state-a tuilian chu kam tawh mah se, tuilenna hmunah hnawmhnawk tam tak inchhekkhawl vangin an harsatna a la tawp mai lo. Rat fever hri lengin, he hri leng vang hian mi 23 an thi tawh nia sawi a ni. Tuilianin hnawmhnawk a lenkhawm zinga metric ton 35,717 chu lakkhawm an ni tawh a, heng zinga metric ton 14,297 chu thil ṭawihral thei a nih laiin ton 18,541 zet chu ṭawihral thei lo chi, plastic leh electronic gadget te an ni. Municipal body hrang hrangte chuan bawlhhlawh lakkhawm zinga ton 13,297 chauh a la tiriral thei a ni.

Local self government bodies minister AC Moideen chuan tuilenna biala hnawmhawk thenfai hna chu hna hautak tak a ni tih sawiin, hengte hi vantlang mipui hriselna atana hlauhawm thei an ni tih a sawi. Sorkar chuan local self government body hrang hrangte chu bawlhhlawh tihral theih chite chu a rang thei anga tiriral turin a hriattir a ni, a ti. Bawhhlawh thenfai hna thawhna kawngah hian Clean Kerala Mission chuan a thawhpui thu a sawi bawk.

Hetihlai hian Kerala Chief Minister Pinarayi Vijayan chu Pathianni khan kar thum chhung vel US-a inenkawl turin a zin. A awmloh chhunga a ai lo awhtu tur hi a ruat hran lo. Chief Minister office thuchhuah chuan US-a CM a cham chhung hian an state-a tuilian tuarte ṭanpuina, chief minister's distress relief fund atana sum thawhte chu industries minister EP Jayarajan-an a lo dawngsawng dawn niin a sawi.

Minister Jayarajan chuan, "CM tan hian midang hnena charge hlanchhawn kher a ngai lo a ni. Minister zawng zawngte chuan dan pangngaiin hna an thawk vek dawn, thil pawimawh leh ngaihtuah hmanhmawh ngai a awm a nih chuan kan lo ngaihtuah mai dawn a, engmah harsatna a awm lo ang", a ti.

Kerala state-a tuilian chu a kam tawh a, tui lenna hnuhma leh hnawmhnawk a lenkhawmte thenfai hna thawh mek a ni. Ruahsur nasa vanga Kerala state-a tuilian leh leiminin chhiatna a thlena thi zat hi mi 348 an ni a, mi sing telin an in leh lo an chan a ni. Report tihchhuah thar berah chuan tuilian tuar chhanchhuah hi mi 80,000 vel niin, sorkarin tuilian tuarte awmna tur hian relief camp 1,500 chuang a siam a, heng hmunah hian mi nuai hnih chuang an la khawsa mek a ni.

Tuilianin thil a tihchhiat hrang hrang siamṭha a, an state indinthar leh dan tur ruahmanna siam turin CM hian global consultant KPMG a ruat a, ministerial palaite chu Kerala mite chen tamna ram 14-ah tirin, sum tuakchhuah dante an ngaihtuah dawn a ni. KPMG CEO Arun Kumar chuan Kerala dinthar lehna tur hian state sorkar chu theihtawpa an thawhpui tur thu a sawi.