GST advertisement atan Rs vbch 100 chuang seng

Sorkar laipui chuan nikum July 1 aṭanga a kalpui ṭan, GST (goods and services tax) advertisement tihna atan print media bikah cheng vaibelchhe 132.38 a seng tawh niin RTI zawhna a chhannaah Ministry of Information and Broadcasting chuan a tarlang.

Sorkar hian outdoor media lamah advertisement tihna atan hian cheng vaibelchhe nga chuang a seng a, GST tihlarna leh a ṭangkaina leh ṭhatnate mipuite hrilhhriatna atan Bollywood megastar Amitabh Bachchan chu brand ambassador-ah hman a ni bawk.

RTI zawhna chhannaah Bureau of Outreach and Communication chuan GST advertisement tihna atan hian print media-ah Rs 1,26,93,97,121-ah sen a nih laiin, electronic media lamah erawh sen a awm lo thung niin a tarlang.

Goods and Services Tax hi nikum July 1 aṭang kha hman ṭan a ni. Hmanṭan a nih hma hian sorkar laipui chuan chhiah lakna thar kalpui tur chungchang hi media lamah a thehdarh hmasa a, ramchhung chanchinbu lian hrang hrangahte full-page advertisement te a tichhuak a, hei bakah hian a kalphung leh nihdan hrilhfiahna pawh a tichhuak fo a ni.