Hardik-an Patidar reservation phutin ni 11 chaw nghei tawh

Patidar hnam hruaitu, Hardik Patel chuan Gujarat state sorkar chu Patidar hnam tana reservation siamsak tura phutin tiam chin awm loa chaw ngheiin nawrh a huaihawt a, nimin kha chaw a nghei ni 11 na ni tawhin, kg 20 dawn a hloh tawh a ni.

Nimin khan doctor chuan Patel-a hriselna dinhmun a endik sak a, a nawrh huaihawt dawnah kg 78 chu nimin khan kg 58-ah a tla thla tawh niin a sawi. Nimin vek khan BJP hruaitu, an party thiltih dan sawisel lam thu sawichhuak fotu, Shatrughan Sinha pawhin Patel hi a tlawh. State sorkar thupek angin Patel-a nawrh huaihawtna hmunah hian Sola civil hospital chuan ambulance a chhawp bawk.

Patel hian Patidar hnam tana reservation siam leh loneitute loan ba ngaihdam phutin August 25 aṭang khan Ahmedabad-a a chenna in bulah tiamchin awm loa chawnghei hi a ṭan a, ni 11 chhung chaw nghei tawhin a taksa pawh a chau sawt hle nia sawi ni mah se, nimin thleng khan Gujarat sorkar chuan a thil phut chungchangah engmah sawilan a la nei lo.

Eptu party-te chuan Hardik Patel-a nawrh huaihawt hi an thlawp a, Congress party chuan state sorkar hnenah a nawrh tihtawp a nih theihna atan quota chungchanga inbiakna neihpui turin a phut. Congress hruaitu Shakti Singh Gohil chuan, "Hardik hian loneitute tan a bei a ni. A thiltih hi Gujarat leh a state mipuite ṭhatna tura tih a ni. Hetihlai state sorkarin inbiakna neihpui pawh a inpeih lo hi a pawi hle a ni. State sorkar chu Hardik hi inbiakna neihpui a, a chaw nghei pawh a rang thei anga tihtawp tir turin kan phut a ni", a ti.

Delhi Chief Minister Arvind Kejriwal-a pawhin Hardik-an loneitute loan ba ngaihdam sak tura a phutna chu a thlawp tih a sawi. A twitter-ah hemi chungchang hi tarlangin, "Farm loan hi ngaihdam a ni tur a ni. Hardik Patel hian loneitu rethei tak takte tan a beihsak a ni. Loneitute chuan a thiltih hi an thlawp vek a, a beihna hi a thlawn lo ang. Pathian in chakna a pe ngei ang", tiin a sawi.

Uttar Pradesh Chief Minister hlui leh Samajwadi Party (SP) president Akhilesh Yadav chuan kum 25 mi, Patidar hruaitu hi a nawrh titawp turin Thawhṭanni khan a ngen.