Petrol man hian Rs 100 a kai thuai ang: AP CM

Andhra Pradesh Chief Minister Chandrababu Naidu chuan ramchhunga tuialhthei man to chho zel chungchangah central-a Narendra Modi-a kaihhruai sorkar laipui chu na takin a sawisel a, petrol man chu litre khatah Rs 100 a la ni thuai ang, a ti.

AP CM chuan petrol man a to chhoh zel bakah, India pawisa hlutna pawh a tlahniam zel a, Rs 100 leh US dollar khat chu a la inhen thuai dawn niin a sawi bawk.

Reserve Bank of India-in pawisa tihthih chungchanga report a tihchhuah chungchang pawh sawi zuiin, sorkar laipui chuan pawisa tihthih chungchang chu ṭha takin a buaipui zui thei lo a ni, a ti. "Pawisa note lian pahnih a tihthih aṭang hian engnge kan hmuh? Bank hrang hrangte dinhmun pawh kan hre vek a ni. Pawisa note lian te hi tihbo vek a ngai. Tunah hian Rs 2,000 note siam hi engnge a ṭangkaina ?", a ti. Digital currency chu a taka hman a nih pawhin amah chuan buaina a neih loh thu a sawi a, hemi rual hian digital leh physical currency-te hi inkhairual taka kalpui a ngai a ni, a ti.

Naidu chuan ramchhung hmun hrang hrangah pawisa note indaih lohna a la thleng reng tih a sawi a, India Gross Domestic Product (GDP) ṭhanna chu NDA sorkar hnathawh vang ni loin, mipuite vanga thleng chauh a nih thu a sawi bawk. "PM Modi hi a inthunun ṭha tawk lo a ni. Vawiin thlengin ATM tam takah pawisa an la indaih thei lo.NDA a sorkar hnuah ram ṭhanna a tlahniam. Sorkar laipui chu thunun ṭhat ni se engvangin nge eirukna a la thlen reng ang? Engvangin nge bank-te an la indaih theih loh? Modi hi tih tak tak na, thu dik leh inthununna chungchang sawi thei a ni lo", a ti.