Sipaite social media hman khapsak theih loh : Bipin Rawat

Khawmual sipai hotu lu ber, General Bipin Rawat-a chuan sipaite social media hman khapsak chu thil theih loh a nih thu sawiin, a ṭangkai zawnga hman dan ngaihtuah zawk a ngai niin a sawi.

Tunhnaiah report ṭhenkhat chuan sorkar laipuiin sipaite chu social media hmang lo turin a duh nia sawi a ni. Hemi chungchang hi sawi zuiin, General Bipin Rawat chuan, "Social media aṭanga kan sipaite thiar fihlim tura thurawn kan dawng a, mahse sipai ten smartphone an kawl kan khapsak thei dawn em ni? Smartphone an kawl tur hi kan dang thei lo a nih chuan, ṭha tak leh ṭangkai zawka social media an hman phalsak hi a ṭha zawk a ni", a ti. Hemi rual hian sipaiten inthunnuna kalphung ṭha an neih chu thil pawimawh tak a nih thu a sawi nghal bawk.

Defence ministry in sipaite tana inkaihhruaina a siamah chuan, sipaite chuan Fabebook/social networking site aṭangin porn an en khap a ni a, WhatsApp/Facabook-a an profile pic-ah an uniform hakna hman khap a ni bawk. An rank te, unit hming leh an hna kaihhnawih thil leh awmna hmunte tarlang lo tur te, an mi hriat loh friend request pawm lo tur te, an chhungte hnenah an post leh hna chungchang tarlan tir lo tur te, thlalak background-ah sipai kaihhnawih thil hmang lo tur te, computer/laptor-ah military information chungchang dahṭha lo turte in a ti bawk.