Covid vanga thi chhungte hnenah Zángnadawmna pe vat ṭhin turin SC-in hrilh

Supreme Court chuan Covid vanga thi chhungte zángnadawmna pekna kawngah state ṭhenkhat chuan hma an la chak tawk lo tih sawiin, thuneitute hnenah mitthi chhungten zángnadawmna dilna an thehluh hun kher nghak loin anmahni zawk chuan mitthi chhungte chu zawng chhuak ṭhin turin a ti.

Court chuan hripui vanga thi chhungte hnena zángnadawmna pek turah tumah hmaih an ni tur a ni lo a, thuneitute lamin mitthi chhungten dilna an thehlut chu an lo hnawl tur a ni lo, a ti. Thuneituten Covid vanga thi tia an pawm tawh chhungte hnenah an rawn dil ngei ngai loin zangnadawmna hi sorkar chuan a pe chhuak nghal zel tur a ni tiin a sawi.

Maharashtra, Gujarat leh Telangana sorkarte chuan Covid vanga thi chhinchhiah aiin zángnadawmna dil hi an tam zawk hle a, hei hi sorkar scheme puanzar ṭhat a,an hriatchian vang a ni, tiin Court chuan a sawi. Hetih lai hian state ṭhenkhatah chuan official-a thi zat chhinchhiah aia tlem daihin zángnadawmna hi an dil thung a, hei hi mipuite hnena information pek ṭhat tawk loh vang a ni a, state sorkar-te chuan information ṭha zawk pe tura hma an lak a ngai a ni, a ti.

Thawhlehni thleng khan state tam zawkah chuan Covid zángnadawmna pek hi official-a thi zat chhinchhiah aiin an tam. Thi zat chhinchhiah aia tlem zángnadawmna pekchhuahna chu Assam, Haryana, Karnataka, Punjab leh Rajasthan-te an ni.

Sorkar laipui chuan Covid vanga thi chhungte hi zángnadawmna, Rs 50,000 pek turin a lo ti tawh a ni.