YouTube channel leh website Thu dik lo theh darhtute chu block zel an ni ang : I&B Minister

India dodal zawng leh thu dik lo an thehdarh avanga YouTube channel 20 leh website pahnih block an nih tukah, information and broadcasting minister Anurag Thakur chuan Thawhlehni khan India phiarru zawnga ṭawngchhuak ṭhinte chungah sorkar laipui chuan hma a la zel dawn tih a sawi.

Intelligence agency-te nena uluk taka zirchianna an neih hnuah, I&B ministry chuan nikum December khan India sawichhiatna leh thu dik lo thehdarh ṭhin YouTube channel 20 leh website pahnih titawp turin thupek an chhuah a ni. Hemi kawnga an hmalaknaah ram dang pawhin an ngaih pawimawh sak a, Youtube lam pawhin hma la vatin an block sak nghal tih a sawi a ni.

Hun lo kalzel turah pawh India dodal zawnga rin thu vawrh darh chiam ṭhin te, thudik lo leh vantlang ṭhen hrang thei zawnga thuchhuah ṭhinte chungah pawh action lak zel a ni dawn tih minister chuan a sawi.

Nikum December thlaa thuchhuah an siamah, I&B ministry chuan YouTube channel 20 leh website-te hi Pakistan network kaltlanga thehdarh ṭhin a nih thu leh, India tana thu hriat nuam lo tak tak - "Kashmir, Indian army, India rama hnambil tlem zawk, Ram Mandir, General Bipin Rawat leh thil dang chungchangah inṭhenhranna leh inhuatna thlen thei zawnga thu an tihchhuah fo thu a sawi.