India ramah ni 249 hnua hri kai hmuhchhuah san ber ṭum thleng

India ramah Nilaini khan coronavirus kai thar mi 3,17,532 awmin, ni 249 hnua nikhata hri kai an tam ber ṭum a ni.

Ramchhungah Covid-19 kai hmuhchhuah mi 3,82,18,773 an awm tawh a, an zingah hian Omicron variant kai mi 9,287 an awm tawh a, he variant hi state 29-ah hmuhchhuah a ni tawh tih nimin zinga Union Health Ministry data tihchhuah chuan a tarlang.

Hri kai mek, active case chu 19,24,051 ah a sang chho leh a, ni 234 hnua a san ber ṭum a ni ve leh bawk. Hri kai mek hi hri kai tawh zawng zawng aṭanga chhutin 5.03% a ni mek a, Covid-19 kai dama puan chu 93.09% a ni mek bawk. Hri vanga thi mi 491 awm belh lehin, thihpui 4,87,693 an awm tawh a ni. Nilaini khan state 13 chuan hri vanga thi hi mi 10 chuang an nei a ni.

Daily positivity rate chu 16.41% niin,weekly positivity rate pawh 16.06% a ni mek bawk.

Nilaini thleng khan Omicron kai chu 3.63% in a pung tih ministry chuan a sawi. Mithiamte chuan mitin tan genome sequencing leh sample endik chu a harsat thu sawi mah se, tuna hri kai tam zawk hi chu Omicron vang a nih thu an sawi.

India rama Covid-19 kai pun chhoh dan chu - August 7, 2020 khan nuai 20 an tling chho a, August 30-ah nuai 30, September 5-ah nuai 40, September 16-ah nuai 50. September 28 khan nuai 60, October 11 khan nuai 70, October 29-ah nuai 80, November 20-ah nuai 90 leh December 19 khan vaibelchhe khat a tling chho leh a ni. May 4, 2021 khan hri kai vaibelchhe hnih tling chho lehin, June 23 khan vaibelchhe thum an tling chho a ni.